من فضلك ادخل كلمة البحث
EN
Back
ادخل البريد الاكترونى
ادخل كلمة المرور

المقالات

الطريقة المجيدة للتخلص من الدهون العنيدة

الطريقة المجيدة للتخلص من الدهون العنيدة

في 3 نقط انت محتاج تعرفها قبل مـ نبدأ المقال ده :
 

  • استهدافك للدهون العنيدة في جسمك و انك تخسس منطقة معينة من جسمك حاجتين مختلفين عن بعض
     
  • انك تتمرن كتير اوي و تاكل اقل ده هيخلي الدهون العنيدة اعند و اصعب في التخلص منها, لازم تطبق استراتيجية صح عشان تتخلص منها و ده هنتكلم عنه في المقال
     
  • المقال ده هيتكلم عن الدهون العنيده من حيث كل العوامل المؤثره والمرتبطه بيها زي الانسولين و تدفق الدم و الحراره مع توضيح ازاي تتخلص منها في الأخر

 

  • ايه هي الدهون العنيدة؟

اول حاجه انت محتاج تعرفها عن الدهون العنيده انها مختلفه عن باقي الدهون , عشان كثافة مستقبلات الـ Alpha Receptors فيها عالية (المسؤلة عن تخزين الدهون) عن الـ Beta Receptors (المسؤلة عن حرق الدهون كطاقة), و حساسة اكتر للأنسولين و بتاخد تدفق دم اقل من الدهون العادية.

 تواجد الدهون العنيدة في الجسم بيختلف من الولد للبنت, في الولد بشكل عام بنلاقي تواجدها اكتر في منطقة الوسط و خصوصا الجناب اما بالنسبة للبنت في بتبقي متواجدة اكتر في منطقة الرجل

زي ما ذكرنا في اول نقطة فوق ان محاولة انزال الدهون العنيدة حاجة و انك تخسس منطقة معينة من جسمك دي زي بطنك او جنابك او رجلك, كتفك وما خلافه حاجة تانية و مبتحصلش عشان جسمك مش بيشتغل كده, الجسم مش بيحرق الدهون من منطقة معينة عشان بتمرنها و منطقة تانيه لأ, ممكن ده يحصل بس علي مقياس صغير جدا جدا عمرك ما هتحس بيه او تشوف نتايجه واضحه قدام عينيك, انما محاولة تخسيس الدهون العنيده بشكل عام فهي بتطبق عن طريق الدايت و التمرين و اخد المكملات المناسبة لتحقيق الهدف ده

 

  • حدوتة حرق الدهون

كلنا بنقول عايزين نحرق-نخس-ننزل دهون بس مبنفكرش ازاي نفهم الجسم ازاي بيحرق الدهون و ازاي اصلا اخليه يدخل في العملية دي , عشان كده لازم نفهم الاول حدوتة حرق الدهون وازي بتحصل :

عشان تحرق الدهون يبقي لازم الدهون تنطلق برة الخلية الدهنية , العملية دي اسمها Lipolysis , بعد كده الدهون بتروح لخلية تانية عشان تتحرق, هنا تدفق الدم من و الي الالياف عامل مهم جدا, بعد كده الدهون بتخش جوة خلية و تتحرق كطاقة و العملية دي اسمها الـ Lipid oxidation

الدهون العنيدة بقي بتطلع الدهون من الخلايا بتاعتها بمعدل ابطأ من الدهون الغير العنيدة و ده بيرجع بسبب وجود نوعين مختلفين من المستقبلات في الخلايا الدهنية:

  1.  اول نوع منهم بيبعت اشارات لتسريع عملية اطلاق الدهون و دي اسمها الـ Beta Receptors  (ده اللي انت عايزه فعال اكتر في جسمك )
  2.  التاني بيبعت اشارات لتبطيء عملية اطلاق الدهون ودي اسمها الـ Alpha Receptors  (ده اللي انت محتاج انه فعاليته تبقي اقل)

النوعين دول من المستقبلات هما المسؤلين عن سرعة اطلاق الخلايا الدهنية عندك للدهون اللي جواها و حرقها كطاقة عشان هما بيزودوا او بينقصوا نشاط انزيم اسمه الـ HSL (الانزيم الرئيسي المسئول عن اطلاق الدهون من الخلايا ) حسب انهي مستقبل مسيطر اكتر في جسمك, الـ Beta ولا الـ Alpha

اللي بيربط بقي المستقبلات دي في الخلايا الدهنية هي الهرمونات دي : الـ Adrenaline و الـ Noradrenaline و الـ Catecholamines

خلاصة الجزء ده عشان لو اتلخبطت انك عشان تتخلص من الدهون العنيده في جسمك يبقي انت محتاج تعمل الحاجات المسئولة عن زيادة نشاط مستقبلات الـ Beta و تقليل نشاط مستقبلات الـ Alpha

 

  • الدهون العنيده و حساسية الأنسولين

بتختلف حساسية الخلية الدهنية و مقاومتها للأنسولين باختلاف نوع الدهون

الدهون العنيده حساسه اكتر للأنسولين, معني كده ان مقاومتها للأنسولين ضعيفه و اقل من الدهون العاديه

ترجمة الكلام ده ان لو الخليه الدهنيه حساسه اكتر للانسولين زي الدهون العنيده ف ده معناها ان الانسولين بيقلل نشاط الـ HSL اللي قولنا عليه فوق (انزيم اطلاق الدهون) و بيزود نشاط الـ LPL ( انزيم تخزين الدهون ) فيها, وبالتالي بيقلل نشاط مستقبلات الـ Beta و بيزود نشاط مستقبلات الـ Alpha

 

  • الحراره و تدفق الدم

اخر جزء محتاج تعرفه عن الدهون العنيده قبل ما نتكلم في ازاي تتخلص منها ان الدهون العنيده بتاخد تدفق دم اقل من باقي الدهون و ده معناه ان حتي لو الدهون طلعت من الخلية الدهنية مبتعرفش تتحرك من المنطقة اللي هي فيها عشان تتحرق بسهولة و ده عشان حاجتين :

  1. مستقبلات الـ Alpha بتأثر علي تدفق الدم للخلية و بتخليه اقل
  2. تواجد الدهون العنيده في مناطق صعب الجسم يرفع درجة حرارتها بسهولة عشان بعيدة عن مركز الجسم زي منطقة الجناب مثلا واللي بتبقي ابرد في درجة الحرارة

 

  • ازاي اتخلص من الدهون عنيده بقي؟

طبعا السؤال اللي في بالك دلوقتي هو ده, و ممكن يكون ده اللي انت عايز تعرفه من او مابتديت تقرا المقال بس كان لازم الاول تفهم كل العوامل المرتبطه بالدهون العنيده بشكل عام

في 3 طرق عشان تتغلب علي الدهون العنيده :

  1. وقف عك الدايت
  2. اعمل cycle للدايت
  3. حفز الجسم بالمكمل الصح

 

  • وقف عك الدايت

عك الدايت هنا المقصود منه انك لو بتاكل قليل اوي و بتتمرن كتير اوي و مفكر كده انك هتخسس الدهون العنيده فـ احنا بنقولك لأ ده كده اسمه عك الدايت

ليه؟

لما تاكل قليل اوي و تتمرن اكتر جسمك مش هيسكت و هيعمل فيك الأتي :

  1. هتجوع اكتر
  2. هيديك طاقة اقل
  3. هيزود معدل شراهتك للأكل
  4. هينقص معدل حرقه للسعرات الحراريه في وضع الراحه
  5. هيقاوم عملية حرق الدهون و هيزود تخزين الدهون اكتر
  6. هيخزن الدهون الجديدة في المناطق اللي انت عايز اصلا تتخلص من الدهون اللي فيها
  7. هيخلي الدهون العنيدة اللي انت مش عارف تخلص منها اعند و اصعب في الحرق

 

عشان كده لو انت بتتبع الطريقه دي لازم توقفها و تعمل حاجه من الحاجتين دول :

 

  1. تاكل قليل , تتمرن قليل (تقتق)

في الطريقة دي التمارين اللي شدتها قليلة هي المسيطرة زي المشر مثلا مع كام يوم بتتمرن فيهم في الجيم عادي

بنسمي الطريقة دي 3:2:1 من حيث الأكل و التمرين :

في الأكل : 3 وجبات في اليوم, وجبتين منهم بروتين و خضار و وجبة واحدة بس فيها كارب معقول

في التمرين : 3 ايام راحة و يومين جيم و ساعة واحدة او اكتر شوية من المشي كل الايام او معظمها

 

  1. تاكل اكتر, تتمرن اكتر (تاتا)

و دي عكس الطريقة الأولي , السعرات هنا و النشويات اكتر عشان تديك طاقة تأدي بيها التمارين الأكتر

الطريقة دي بنتبع فيها اسلوب 3:2:2 في الأكل و التمرين برضه

في الأكل : 3 وجبات في اليوم , اضافة عليهم وجبتين سناكس بروتين و مرتين من ال 3 وجبات هيبقي فيهم نشويات (واحدة منهم في الوجبة اللي بعد التمرين )

في التمرين : 3 ايام تمرين في الجيم و يومين تمارين من نوعية Insanity و MMA كده و يومين كارديو عادي زي الجري او نط الحبل

 

كل من الطريقتين دول هيمنعوا اللي جسمك هيعملوا في حالة لو اكلت قليل اوي واتمرنت كتير

 

  • اعمل Cycle للدايت

و احنا هنا قصدنا انك تعمل دورة تبديل ما بين طريقتين الدايت اللي قولناهم فوق دول عشان دايما تخلي عملية التمثيل الغذائي نشطة ده غير ان نشاط هرمونات الحرق هيبقي اعلي و الدورة دي ما بين النظامين هتمنع حتي ان حساسية الانسولين في الخلايا الدهنية تزيد

طبق الـ Cycle دي بانك تمشي طريقة تقتق من اسبوع لـ 2 بعديهم اسبوع لـ 2 طريقة تاتا

 

  • حفز جسمك بالمكمل الصح

مع تتطبيقك للخطوتين اللي قولنا عليهم فوق تقدر تتطبق الخطوة دي عشان تضمن نتايج احسن

عشان تاخد مكمل في المرحلة دي ف لازم تختار مكمل هيساعدك تتخلص من الدهون العنيده و ده معناه ان ليه ارتباط بالعوامل اللي بتحفز الجسم انه يتخلص منها و في الحاله دي ممكن تاخد الحاجات دي او منتجات يبقي فيها المكونات دي :

- مستخلص الشاي الاخضر علي سبيل المثال عشان بيحفز هرمونات الـ Catecholamines اللي قولنا فوق انها بتزود من اطلاق الدهون من داخل الخلية الدهنية

- ممكن كمان تاخد الـ Yohimbine لدورة في مضاعفة كمية الدهون اللي طالعة من الخلايا الدهنية

- الـ Synephrine لتحفيزه لمستقبلات الـ Beta

 

و في نهاية المقال كده تقدر تلخص الموضوع كله في النقط دي :

  1. عشان تتخلص من الدهون العنيده محتاج دايت و تمرين و مكملات صح
  2. انك تخسس منطقة واحده بعينها صعب جدا, الجسم بيحرق الدهون من الجسم كله مش منطقة بعينها , وبيحرق الدهون العنيده بمعدل ابطأ من الباقي
  3. الدهون العنيده عنيده عشان حساسيتها العاليه للانسولين و احتوائها علي مستقبلات Alpha كتير و تدفق الدم فيها قليل
  4. الدايت الغلط هيزود الدهون العنيده عندك اكتر بسبب لخبطة الانسولين و زيادة مستوي مستقبلات الـ Alpha ونقص مستقبلات الـ Beta
  5. لازم تغير في الدايت الصح بتاعك كل فترة عشان جسمك ميتعودش علي سيستم معين, فوق ذكرنا طريقتين (تقتق و تاتا) ممكن تستخدمهم او تستخدم طرق تانية لو انسب ليك, اهم حاجه يبقي فيه توازن في الدايت و التمرين
  6. المكملات عامل مساعد و محفز قوي, اهم حاجه تختار الصح ليك و تكون اصلا ماشي علي نظام سليم, متستناش منها حاجه لو انت نظامك كله عك

 

مقالات ذات صلة

التعليقات

2 التعليقات
15 Jun 2016, 11:31 am
under_taker3232@yahoo.com

Karim Stohy

والمكملات دي زي ايه وايه يتاخد معاها

5 Sep 2016, 10:36 am
okhalil86@ymail.com

Osama Khalil

كلام رائع